Vstupleňe

Kratka osnova horvatsko-slavenskoga pravopisaňa — Vstupleňe
autor: Ljudevit Gaj

Ako Horvatu premišľavaňe nastojne i nevtrudlive marlivosti svojeh bratov slavenskeh osebito Čehov, Lehov i Rusov, z kojum oni občinski vert naroda obdelavati žuriju se, istinito vživaňe prave narodne radosti i slasti donaša; tak mu ogled na premilu dragu domovinu i ňene sine vu dnu nutrine serdca žalost i tuguvaňe zbuďava, kojega koreňe glibše je, neg da se ňegva žuhkoča i gorkost zmreti more. - Vidi onde slavno i krasno razcvetujuče se slovstvo (literatur), tak se mu vu ňegvi domovini malo-kteri tragi takvoga kažu, koji samo za okerhke zpomenikov dobroga hoteňa nekojeh narodoľubcev imati se moraju. - Vidi onde materinski jezik vu dostojnom pošteňu i časti, tak ga ovde boreňe, kojem se dobra majka i verna stara gospodarica vu lastovitem domu z prirevnicami svojemi boriti primorana je, na vruče suze britke žalosti gene. - A kada vidi, da isti sini milu staricu svoju iz gospodarstva izrinuti hočeju, da okinčni povsud priatnoj Teuti, ali meňe izobraženi, preľuto z nepravdenum podstupľivostju nasilnoj susedi vklaňati se mogu, onda se persa ňegova zdižu visoko, i skrebno poziva pravičnost! - - -

"Plemenite serdčanosti je, istinu odperto valuvati; hrabre jakosti, ňu slušati moči."

Materinski jezik vu horvatski zemľi, ako baš za ništar i nemar nederži se; vu nikakovem vendar poštenu nestoji izvišen. - Mužev, koji se za ňega nekuliko trudili i starali jesu, plača bila je ružna nezahvalnost, nekda pače sramota, ter kaj više je, odurjavaňe i regon. - Nili vre čas suprotstaviti se takovem nevoľam? - A kdo k občinskom dobru z preobladaňem škodľiveh predsuďikaj doprinesti mogučega se čuti, nesme prez greha proti domovini mučati.

Nut domorodci! nepustemo vu devetnajstom stoletju Horvate k predmetu pravičnoga poteptavaňa poniziti se, zverho kojeh hrabrosti i jakosti osupňeni puki čudili se jesu. - Dajte da sada vu vremenu mira vitezi vu duhu budemo, da tak jezik, kojega najvekši Muževi naroda našega z ľubavjum govorili, kojega z imetkom i z predragum kervčicum svojum junački branili jesu, (vre prez toga od zle dvorbe pohabľen) još naj potlam v temni grob nr zakopal se!? -

Sljedeća stranica→