Oslepele budu mi jenput te oči,
Kaj tak su mi gledele rade
I leta ti v cvetju i jesenih žalost
I sneg i protuleti mlade.
Na zadnju molitvu mi sklopili budu
Te ruke, kaj dragat su štele
I zlatni tvoj klas i črlene ciklame
I sence i lilije bele.
Več ne budu vusta mi šeptati mogla
Te reči ti sladke, bogate,
Več ne bu mi tuklo nesrečno to srce,
Kaj, dom moj, je živelo za te.
Znam, skoro me ne bu i ja bum pozabljen,
I samo popevke te male
Još dale se budu spominjale z vami,
Tak same si zvonele dale.
I štel bi, da v vsakoj živi moje srce.
I štel bi, da vsaka ti vrača
Vsu ljubav, vse lepo, kaj ti si mi dala,
Ti draga, ti reč mi domača!
