Vilinskoga kralja kčer

Pisani oblik

Bajka je zapisana u sljedećim knjigama:

• "Sto prostonárodních pohádek a pověstí slovanských v nářečích původních", Karela Jaromíra Erbena iz 1865. godine, i
• "Slavische Bibliothek. Beiträge zur slavischen Philologie und Geschichte.", F. Miklošiča i J. Fiedlera iz 1851. godine.

Vilinskoga kralja kčer

Tak je bila jedna majka, koja je bila noseča. Kad je išla jeden put iz cirkve od meše, popali su ju trudi da bu rodila. Onda kam če? Skrila se je pod jeden most i porodila je sina srečno. Nu taki su došle tri Rojenice. To su ove babe, koje sudiju 'sako dete, s kakvum smrtjum prejde iz ovoga sveta.

Jedna je rekla, da očemo ga taki pogubiti.

Druga je rekla: „Nečemo ga, neg kad vekši zrase, onda ga očemo, da bude bolje materi za njega žal."

A trejta je rekla: „Nečemo ga, neg ako vilinskoga kralja kčer ne zeme, onda ga čemo vubiti." I tak je ostalo.

*

Gda je on veliki zrasel, veli materi: „Mama, ja se bum ženil."

— „A, moj sinko, ti veliš da se bus ženil, ali ova je ili nijedna za te."

On ju pita: „Zakaj ne?"

Ona njemu pove: „Je, tak su te sudile Sujenice, da ako ne zemeš vilinskoga kralja kčer, očeju te vumoriti."

Onda on veli: „Nu, ja ju idem iskat, a pređi idem pitat jednoga starca kovača, morti bi on znal to mi povedati, gde je ona."

Kovač veli: „Moj sinko, to bude tebi težko najti, neg ti idi k mesečni majki, ako ti ona ne zna povedati, ja ti ne znam, gdo bi ti bolje znal kak ona." I dade mu tri železne cipeliše i odpošlje ga k mesečni majki: „Kad dojdeš do nje, samo ju primi za rame, onda te bu vre ona pitala, kaj bi rad, i vre ti pove."

*

On je išel, i kad je vre štel cipeliše dodreti, došel je do mesečne majke i prijel ju je za rame. Ona ga je taki popitala, kaj bi rad. On veli: „Ja bi rad našel vilinskoga kralja kčer."

— Ona veli: „E, moj sinko, ja ti neznam, neg morti moj sin zna; čekaj dok dojde on dimo, onda buš njega pital. Ali ne sme tebe najti, mam bi te rezdrapal. Gda dojde dimo, bude taki poznal, da si ti tu. Nu ja tebe skrijem i gda bude ori trejti put popital, da gde je krščanska duša, onda ti odgovori: Ovo sem! pa ti ne bu nikaj mogel." Baba ga je pod korito skrila. Mesec dojde dimo i pita: „Mama, ti imaš krščansku dušu." I kad je trejti put popital, gde je krščanska duša, oglasil se je: „Ovo sem." I onda inu je nikaj ne mogel včiniti, drugač bi ga na prah reztepel. Popital ga je, kaj bi rad. On veli: „Ja bi rad našel vilinskoga kralja kčer." Mesec: „Ja ne znam, neg ako ne zna sunčena majka, jer ne znam, što bi drugi znal. I pokaže mu put, kojim mora iti.

I obul si je druge cipeliše, i kad je vre štel i nje rezdrapati, došel je do sunčene majke i prime nju za rame. Ona mu taki veli: kaj bi rad? On ji reče, da jeli bi ona znala, gde su vilinski gradovi, da bi rad dobil vilinskoga kralja kčer. Ona mu takaj veli: „Je, moj sin, ja ti ne znam, neg ako ti moj sin ne zna, ja ti ne znam, gdo bi drugi znalj čekaj malo, dok on dojde dimo." I ona ga je pod korito skrila, i tak se je na trejti put oglasil, kad je sunce pitalo: Majka, ti imaš krščansku dušu: „Ovo sem." Ine je mu sunce moglo nikaj včiniti, i pitalo gaje, da kaj bi rad. On je odgovori!, da išče vilinske gradove i vilinskoga kralja kčer. Onda mu je sunce reklo: „Je, ja ti ne znam, neg ako ti ne zna bura kobila — to je bila bura ili veter — onda ja ne znam, gdo bi znal." Onda mu pokaže put i veli: „Gda dojdeš do one senokoše, gde je trava tebi do kolena, ondi ti je ta bura kobila. Ako ju ne bi našel tam, počekaj ju, ona ti dojde se past. Nu onda naj iti mam k nji, neg se skrij za drevo ili v jamu, pa kad dojde, ju primi za vuzdu mam, neg drugač ti ne bude dobro."

On je odišel, i obul si je trejte cipeliše, pak išel, išel i dospel je do senokoše. Kad je došel, ne je bilo bure kobile do zorje. On se skrije pod jeden most, i kad je došla k mostu vode pit, onda ju je samo zgrabil za vuzdu, i ona ga popita, da kaj bi rad. On ji odgovori, da bi rad našel vilinskoga kralja kčer. Ona mu odgovori: „Dobro, sedi na me." On sede na nju, pak mu ona veli: „Ali ne buš opal?" Ona se stepe. Skorom je opal, samo kaj se je z nogum zadržaL Onda drugoč seje stepla, i onda je skorom opal. I trejtič se je stepla, i onda je skorom opal, samo kaj se je s kolenom zadržal.

Vezda mu je ona rekla: „To bude meni škodilo." I išla je tak ž njim kak vtica, i trčala i dotrčala do dveh stupov. Kak je blizu došla, od onoga slapa su se stupi rezdvojili i fletno zaprli i kobili repa malo odtrgli. Vezda mu je kobila rekla: „Da ti vidiš, ovo ti mi škodi, kaj si skorom opal." Onda bejži dok dobejži do vilinskih gradov. Vezda mu veli: „Ti naj se opiti ili pozabiti, da ne bi k meni došel."

*

On je rekel, da dojde i odišel je gor. Oni su ga mam prijeli i gostili, i on je mam pital, da jeli mu dadu kčer. Oni su mu obečali, da dadu. Onda su se gostili i jeli i pili, dok nastane kmica. I kad dojde večer, on veli, da mora iti van zarad sebe, da dojde vre nazaj. On je odišel van k buri kobili — a nji su donesli sto centov sena.

— Skril se je kobili vu rep. A ovi su ga iskali i nisu ga mogli najti; ali ipak su ga skorom našli k zorji, ali je kokot zapopeval, pa onda su mu ne mogli nikaj.

Došel je posle vnuter, i dali su mu pak jest i piti i pitali su ga, da gde je bil. On je odgovoril: „Pod plotom sem spal, sem opal i onda sem mam zaspal". I kobili su dali sto centov sena in nekuliko drvenjek zobi. I tak su se gostili celi den do večera. Onda je opet išel van i pak kobili vu grive. Ovi su ga pak iskali celu noč, ali su ga ni mogli najti, nu več k zorji baba veštica je povedala, da je v grivaj. Onda bi ga bili skorom našli, ali kokoti su zapopevali i nisu ga mogli več onda vubiti.

A posle su v celem selu kokote poubili. On je opet išel v grad. Jesti i piti dali su mu, kaj je štel, i kobili po navadi sto centov sena i nekuliko drvenjek zobi, i rekli su mu: „Da večer ti ne buš nikam išel, mi ti pripravimo 'se, kaj ti bude treba." Kad je večer došel, zmirom su bili pri njem, ali ipak su se rezišli. On van, pa kobili. A ona kam če ž njim? Skrila ga je pod nogu v podkvu, kajti je imela veliku nogu. Onda oni opet iskat. A on je čez den zel dve jajce i kobila je do večera vu vratu žvalila, i malo su zrasli do večera. Kad su ga pak iskali, nisu ga mogli najti.

Onda k zorji po babu vešticu. Ona je rekla, da je pod kopitom kobilnim. Oni su ga vre šteli van zeti, ali pevci su zapevali oni, koje je kobila vu vratu žva- lila. Pa su mu ni mogli nikaj včiniti, pa su i one dva pevca za- tukli. Vezda je rekel, da naj mu daju kčer, da bu vre odišel; Ali kralj je rekel, da mu ju ne da, zakaj je ni tam spal, gde mu je on pripravil postelju. On se spričaval, da je bil pijan, pa je išel van, pa je opal i onak zaspal. Ali kralj mu je ne štel veruvati. Vezda ga je molil, da dojde kči k njemu, da ju barem kušne. A pređi ga je kobila navčila, gda dojde da ga kušne, samo ju naj prime i potegne na nju, da budu. vujšli ž njum; i onda naj zeme kefu, čim se konji snažiju, česalo, čim se konji češeju, i steklo vode Tnaj dobro spravi k sebi. Nu kad mu je kralj dopustil, da ide kči njegova da ju kušne, stala je na strumenjek na njegovu nogu, i kako je stala da bude kušnula, a kobila bejži i čez vrata duknula, pa bejži bejži. A kralj to vidil, pa po svojega konja pa za njimi. Ovi su več dalko bili. Na jen put veli kobila: „Ogledni se, jeli što ide za nami." Onda se on ogledne i veli: „Ide, samo da se za rep ne lovi."

Kobila veli: „Hiti kefu." Hitil je kefu, i postala je za njimi šuma, da je ov komaj prek se vlekel: siromak ne mogel po trnju se vleči. A ovi su za toga dalko odišli. Kralj pak se je prevlekel i opet za njimi bejži bejži tak dugo, da je opet dostignuti štel. Kobila pak veli: „Ogledni se, jer ide što za nami." Ogledne se, vidi da je vre blizu, samo da se za rep ne lovi, pa veli: blizu je, samo da se za rep ne lovi.

Kobila reče: „Hiti česalo." On hiti i postalo je veliko bregovje jedno do drugoga, pa bejži dalje, da su vre jeden komad veliki odišli, a kralj je komaj čez brege prejahal, pa opet za njimi, da je pak dostiči štel. Kobila veli njemu, da se ogledne, jeli gdo ide za njimi. On opet veli da ide, samo da se za rep ne lovi. Kobila reče: „Hiti steklo z vodum." On hiti, i postala je velika voda, da je kralj težko mogel prek dojti. A ovi su več dalko odjahali. Komaj je kralj izišel iz vode, pa onda opet za njimi bejži bejži, i štel je vre dostiči, a kobila je bila vre blizu stupov, i stupi su se od slapa odprli i kobila prebejžala, i pak su se zaprli, a kralj pa ni mogel iti dalje čez stupe i zakričal je glasno: »Zet, nejdi dalje, ja nemrem dalje; naj mi kčer odpeljati, da ji ne bi ja nikaj dal."

Vezda hiti nekak prek stupov svoj pojas, ar ne je imel drugo ji dati neg onaj pojas. A onaj pojas bil je takov, da kajgod je štel, ono je zadobil. Onda se je kralj povrnul, a ovi su veseli ostali. On je buri kobili lepo zahvalil i išel mam dimo, kajti je pojasu rekel, da je mam postavi k njegovi kuči. I ondi su napravili velike gosti, kaj njim je bilo zadosti, i ja sem tam bil na gostili i gostil sem se.