Starinsko pripečenje
| ← Naslovnica | Starinsko pripečenje autor: Antun Gustav Matoš |
|
pripovjetka je prvi put objavljena 1911. godine. |
Bil vam je tak v jednom selu opančar. Zval se je Cenek Ščukanec. Bil je jako dober človek. Caru je daval carevo, bogu bože, a bližnega je imal rad kak sam sebe. Ni bil baš veliki bogomolec, ni lizal poda f cirkvi, kajti je znal da je Gospon Bog sigde i da je boža cirkva celi lepi ovaj boži svet. Imal je samo jednu falingu. Štel je se znati, makar ni dobro preveč znati, a još gorše se znati, kajti samo Gospon Bog se znati smeju i moreju.
Jene večeri je naš Cenek z svojom tovarušicom baš štel spati iti, deca Miškec i Rožica već su bila f posteli, a nato vam negdo počne kučiti po obloku.
— Jezuš na, Cenek — reče Ščukancovka — to su za sigurno tati i tolvaji, poteri ih sveti križ! Naj im, dragi Cenek, za niš na svetu otpreti!
— Ha, verek, pak nek jesu tolvaji i tati. I fakin je človek kak sem ja. Denes je sveta nedela, siromaki su morti gladni, a ak su lopovi, onak nam samo život zeti moreju i nek im bu.
Cenek na oblok i reče: — Gdo ste, boži ljudi?
— Gladni i bosi siromaki bez krova. Pogorelci. Naj nas nutra puščaju za lubav našega gospodara Jezuša i gospe Majke bože bistričke.
Cenek dukne, pušča ih nutra i reče im:
— Falen bog, siromašni pogorelci. Kesno je, nedela je, veto smo večerali, ali za dobre stare Horvate bu se već nekaj našlo. To je moja naj prostiju žena, a ti, Barica, daj metemtoga malo slanine, jaje, kruha, polič vina i na vrtu natrgaj malo mlađega luka. Ak još jenput večeramo, nebu carevina prepala. Prosim boga i njih naj se dostoju šesti.
Jen pogorelec već je bil stari. F košari je imal bradvu. Zgledal je kak žagar[1] ili zidar. Drugi je bil puno mlajši. Zgledal je betežnovan, imal je tenku bradu i oči kak da se furt plače.
Gosti su bili jako lačni, i kad su se navečerali šunke, jajec, luka i kruha, Barica donese škaf i kopajnu i opere im s Cenekom prašne nažulene i krvave noge.
Kad su v jutro pogorelci gosti s Cenekom odišli, najde gospa Bara f kutu jenu pogorelsku palicu i sune v zrak kak da ju je kača[2] drgeznula ili pozoj fpičil. Batina je vendar v nezinoj ruki počela dobivati listje kak ružmarinska grana, po boti su počele cvetati rožice, klinčeci, fiolice i farbe kak na vuzmenoj pisanici, a cela hiža vudri dišati po temjanu kak da f cirkvi gospon biškup mešu služiju.
Cenek je došel z svojimi gosti do Majke bože na križajnu, i kad su se počeli za srečen put kuševati, reče mlajši pogorelec s tenkom bradom i z očmi kak da se furt plače:
— Vezda, predi nek odidemo, reci, Cenek, kaj si želiš. Se buš dobil kaj hočeš, kajti sem ja tvoj gospon i spasitel Jezuš, a ovaj starije onaj trdi kamen Peter, na kojemu sem Cirkvu svoju zidati počel. Kak nekad v staro vreme, idemo po svetu iskati dobre i čiste ljude, al ih nismo puno našli. Još uvek penezi, još uvek zlatni junec gospodari na svetu, bogataš globi siromaka, sabla kole slapšega, a sveta reč se za Judašovo srebro prodava. Još uvek sluge i moji apoštoli zidaju moju Cirkvu i moja sveta Cirkva još uvek ni gotova. Ti si ju zezidal f srcu svom ter zaželi od mene kaj ti srce išče, pak mir vam svim ljudem dobre volje.
Cenek kušne Gosponov skut i zaprosi samo jeno. Prosil je Jezuša Kristuša i svetoga Petra naj dostoju zapovedati nek mu zdenec v negvom dvorišču sve pove kaj se bu pripetilo.
Tak je i bilo. Bozi sin i sveti Peter odideju dale po belem svetu, Cenek dojde doma v dvorišče, luče vu crni zdenec i pita:
— Reci mi, moj zdenček, kaj bu za dvadeset let z mojom da prostiš ženom Baricom, z mojom decom, Miškecom i Rožicom, i s Horvatskom, mojim polublenim orsagom?
Kaj je Cenek v zdencu videl, ne zna niko osim boga, ali je moralo biti jako hudo, pokehdob je siromašni opančar od jada vujnega duknul, ftopil se, i kad je došel pred zlatni lokot na vratih dike nebeske, pove mu sveti Peter apoštol:
— Vidiš, Cenek, ti ne bi tak rno došel v diku nebesku, da nisi štel preveč znati, kajti ni dobro preveč znati, a tulikajše još menše je dobro sȅ znati, pokehdob samo Gospon Bog sȅ znati i f srcu Jezuša Kristuša i Majke bože sȅ zločestoće, sȅ grehe, se mukȅ i sȅ suze našega zemalskoga života nositi moreju i hočeju.
| Povratak na vrh stranice. |