Fini profil silhouette,
Cvetje, kaj zdavna ne cvete.
Još se v venčeke plete,
Koji već niš ne dišiju,
Samo se stiha drobiju
V molitveniku malom.
Pred onim mutnim zrcalom.
Ruke tak drobne i blede,
Sladke kak dah od rezede,
V davne su listale dane
Zlatom zarubljene strane.
Morti su plave se oči
Mesečne zmislile noći,
Tajne, kaj v srcu ostane.
Morti i usta ta mala
V žarkoj molitvi bi znala
S čudnog zadrhtati smeha.
Kaj im je žal bilo greha?
- Kipci mučiju to sveti,
A mrtvi su v knjigi cveti
- I dama na silhouetti.
