Seh-duš dan
autor: Vladimir Nazor




Se zvēzdȉ su sjale,
Kad sãn te rodȉla;
Tȉce sũ kantȁle,
Kad sãn te dojȉla;
A kad pȅrē sahlo
I maglȁ nas krila,
Ja san te va črnu
Zemlju položȉla...
Nȉnāj, nȁnāj, lẽpī sin!
Na grobȅ tī j' ružmarȋn.

Nad glāvũn tvojũn san
Pet sveć posādȉla,
Od ũst otkīdȁla,
Dok san ih kūpȉla.
Ki te majki dal je,
Sran ga je pred mȁnūn,
A vas svet rūgãl je
S tun mojūn se rȁnūn.
Ninaj, nanaj, lẽpī sin!
Tvoj otȁc je gospodȋn.

Skroz moj dom je črna
Tica proletȅla;
Skroz lug me peljȁla,
Dok me tu dovȅla;
Kot da zvȇr me tera,
Su noć san bežȁla
Ter trūdnȁ i strta
Na tvoj grob san pala...
Sine lẽpī, slatko spȉ!
Na grobȅ ti mat ležȋ.