Dudaša i jopicu
v dežđljivoj markloj noči
Martinska Guska zestala je:
"Kam grete, pajdaši,
povečte me!"
"Bakuša Boga iščemo, draga,
jen lagev da žganja otpre nam!
Pajdašica, pojdi ga iskati z nam!"
V bertiju su zašli gdi riba čverči,
v ponjve moruna se v olju kadi,
vragomlek trava kak badnjak diši.
Tu tolvaj jen morski je vino pil,
kositreni bilikum po Guske razlil.
Martinska Guska je tolvaja
s krelutmi fajtnemi zmotala,
z biškupom masno sklopotala.
Dudaš je jopice jen kalež žganice
da zbatri jopicu nalil v požirak,
jen frater pavlinec, z čubom kak mlinec,
kaj čkomel do teg kak mutlast mutak,
je počel popevat kak sam hudi vrag.
"V dežđljivoj markloj noči Ovidijuša je dobro čitati,
kod tega vraga vračtvo za vuloge pitati:
podagram tollere nescit medicina.
Ak te žiga v kostmi, popij pehar vina,
kaj vino je još navek najbolša medicina!"
"Ja sem svoja jajca odsedel v Firence
i cerkvenim knjigam pregrizaval herpte.
Nabubal sem se prevučene recepte.
i Svetim Ocom krunil lavorične vence.
Kaj imam od tega?
Beteguv šerega!"
"V mehuru žučnem čutim iglene kamence,
a spravlal sem kak čmela učenosti vojska,
da v božjem orsagu postanem tvarda Vojska.
A kaj sem denes? Senca i senca svoje sence!"
"V komorice veruvani žitkapisec,
Pavlin, Otec, gvardijan i lisec,
kaj se polehko z dana v dan shlapljuje.
V meni greh još navek kakti Grifon kljuje,
ja se iščlovečujem.
Človečansku narav kak srab smardljivu slačim,
dijakima laži za istine tolmačim."
"Spovedam se, valujem se, pred fratrima se sramim,
molim se i čitam, z molitvum se dramim.
Postim, klečim, štimam, čutim, trapim,
za luči biblijskom kak za vanshajanjem vapim."
"Tenčine same, zgingavanje trudno,
smartnonosno nahajanje z dana v božji dan.
Ja štimam, sudim, čutim da sem Lutoran."
"Od herptov su knjižnjih zdraveši
fazanski slatki herpti!
Belzebub s peklenimi biškupi, adepti.
Ponjva prasečine, slatke devenice
i fašnik pijani neg smertni plač device.
Vonjha debele, červene dekle kmetske,
kak kutine tvarde bele, tople cecke."
Dudaš i jopica, čarni tolvaj morski,
pijan i plačuči jen pavlin zagorski,
z Martinskom Guskom se je zmotalo se.
Jen šišmiš zrušil lampaš je na tle
i čarnimi krelutmi utarnul te
pijane, mračne grešnike.
