Po vrtu Vašemu već stezah videt nî,
Prekrilo ih je vse kak samo čisto zlato.
Al nî to sunce, nî, zabadav želet ga,
Na dugo zašlo je za nebo olovnato.
To suho listje je, kaj veter severni
Po svržih strgal vsih, zasipal tihe steze,
Donesel grubi mraz i strusil rožice
I slekel opravu, tu tenku z bele breze.
A meni vidlo se, da sunce to sveti,
Da vrnulo se pak, da cvetje bu dišeće,
Osipalo ves vrt i plavi da metulj
Pred očmi mojimi leti vre i trepeće.
I mislim, da gledim, kak dvoje šeće se,
O, dobro poznam ja Vaš korak tih i droben,
I čujem, kaj veli Vaš bledi kavalir,
Al čudno mi je to, da meni je spodoben.
Nî vsega toga, nî. Još zadnji opal list
Na pusti taj rondô sred divje guste trave.
Vre dugo leta nî, al ja sem senjal ga,
Kad včera videl sem te drage oči plave.
