Vešča, bahornica, ščerbava copernica,
kaj spreklela ju sama
Marija je Bistrica,
dala mi je poždret
vračtvo čarovnice:
pajnkertovo oko z brabonjkom lasice.
V marcelu zdrepaneg pavuka otrovca,
zub od gluhog pilka, godišnjeg udovca.
Tri papka od vepra, na Vuzem škoplenog,
i hudog korenja s paprom zdroblenog.
To se z oblizanjkom mlade mesečine
v tri kaplice ženske mesečne tečine.
Od muškog zavrčka noket v šljivovici
i kušlecov pušlec šepavoj veščici.
Vračarica, čarovnica, čorava Betika,
suha kak metla, smuda, haeretica,
kaj bubna na bobnju s kožicom muškom
i fučka kak pava s peklenom komuškom,
kak s trumbentom, Hudome vu vuho,
dala mi je popit začinjeno juho:
od jadrice žolčne egiptovskeg oreha,
od ženskih lasi scopranega teha.
Parilo osmujeno od dečjega mesa,
na kvaterni petek, šepava nebesa!
V polnoči gluhoj na kvaterni petek,
ja mislil sem konec je, a bil je početek.
Cvet ženski zemati i mleko prijemati,
znamenuvajnje muško kak hostiju zemati,
na metle jašiti i purgare plašiti,
popa vu vražnju torbu zašiti,
prevrči se v cucka kaj s turna plucka
i luctvo jeno na drugo hucka,
vragoduha zvati, presveto olje zlejati,
rit si na dušici oltarskoj grejati,
z mačkom se zmešati, tolvaja vešati,
z kotrigov dečjih mošta sprešati,
spram coprarije te se to ni bilo niš,
kaj ja sem spoznal je, potari nas križ!
V tmice, v pivnice, brez ikakšne luči,
čul se je veter kak v praznini huči.
Čuli su se glasi kakti talambasi:
Bežete, bežete, vi pogane žuči,
tuče se černe spremaju potuči
se vas v pivnice, v hiže i po kuči,
kaj blodite bez doma po vetru i po tuči!
I videl sem daljine, meglene i kalne,
i videl sem glibline, se dalne i dalne.
I videl sem strele, žveplene, blisiču.
Občutil sem merliča perst na ogerliču:
na jabuki Adama hladni tuji palec,
bil sem v čarnom plašču, hman kak zvezdoznalec.
Dalko anda dalko je ne bilo nič,
zimljičavec, četertavec pezdel je hudič.
Sablazen i larfa v čislu očenaša,
na merličkoj plahti kak rana grabancijaša
otparla mi se v oku gliblina mračna naša.
Jen zgoreni kotec na tri palanjka,
kak prekleti melin s tridesetri ganjka.
Peklena zganjka rascufanega canjka
i stražnjica kaj se v svojem kalu sanjka.
Flandra, kaj se v jutro zuvle, na večer obuvle,
obruč kugle na četiri vugle.
Podežganje hiže podežgalcov samih,
palandra, kaj svoje se meštrije ne srami.
Smardlivi kadaver kaj se v vonjhe pajca
krepanega zajca, digu digu dajca.
Pasoglavcov krutih golubica v parklah
i čarna nit konca na preslici Parkah.
Pasoglavci smarde, kak futači pezde,
vu žveplenom risu brenčiju škure zvezde.
Med zvezdami jena kalna zvezda.
Incipit ketač planetarijoma obertati se vezda.
I videl sem v megli,
v megli sem videl:
Zerinski grof črez meglu
kak slepec gre v Beč.
A nazaj ga nebu, a nazaj ga nebu, a nazaj ga nebu
nigdar več.
I Jelačiča Bana i Gospona Gaja,
I Njih sem videl bloditi v Beč:
tam buju svoju, tam buju svoju, tam buju svoju
popluvali reč.
I videl sem v megli tristotin banov,
tristotin banov, tristo galanov,
kak zmirom črez meglu blodiju v Beč.
Tristotin banov črez meglu sem videl,
kak ničemurnjaki pleziju v Beč.
Tristotin banov na konju, k Jagelonu,
tristotin banov vu salonvagonu,
tristotin banov blode v Budim,
petsto let jognja, petsto let megle,
Turčin i jogenj i karv i dim.
V megli sem videl, videl sem v megli:
seh križneh putov konec i kraj.
V meglenom blatu, v pogrebnom maršu,
otkod nas nigda več nebu nazaj,
Ileri kak pilki, faklonosi,
zaškrabani dijaki, larfonosi,
pokapali su paradno starinsku reč Kaj.
Kak zvon je Kaj grmelo,
kak kres je Kaj plamtelo,
kak jogenj, kak harfa vekomaj,
a oberpilko v gali,
s pogrebnom faklom v roki
med ilerskimi fanti,
mertvečkemi snuboki,
španceral se
doktor Ludwig von Gay.
Cinkuš je lajal v megli, golgotski,
pokapati smo znali furtinavek gospocki.
Smolaveh faklah dim sajav, rdeči,
koruš černoriscov, reverend čkomeči,
psalmov pogrebneh pri mertvečkoj sveči,
pogrebni marš, ilerski marš brenčeči,
circumdederunt i karmine zle
orgula, misleč da strofe jesu te
repača Renesanse, slavjanske Budnice.
A človeka je ne, ki v smartne panike
glas dignul bi kak veter, da pravdu nam pove,
kak oroslan da rukne v taj špalir teleči,
v pogrebnu paradu, v ilerski marš brenčeči:
čarni to grudanjek, a je ne komet svetleči!
Neistolnačno mračno nečutenje Reči
piskačov kukurjaveh, šljivarskih rufijanov,
šipusov i lirskih zgubidanov,
zežgalo, zdruzgalo i zniščilo je se.
Ta dična parada pri ilerskoj sveči
ni Trijumf skerlatni, ni Preporod rdeči
neg deh merliča z kervave nuternje,
kak fašnika kaj zdigli na vaše skolke ste,
a da je Finale to nigdo ne ve.
Kajkavska reč Kaj vre jezer let klopoče.
Kak prekleti melin očivesto je
do denes, bogme, zmlela ni jene knjige ne,
Kaj mele bogčije, strah i bedastoče.
Kaj žuhko je, ne ferfla, ne berboče,
z gingavem ciglam hiža podzidana zgledi.
Kaj nigdar slatka stara frajla bila ni,
vekomaj truca Kaj, Kaj cvili i joče.
Tak včeraj bilo je, tak bu i v bodoče.
Na grobu žive Reči knjiga se zidati ne da!
Knjigarov, Poetov prekleta martva čreda,
kak kajkavske smarti krepala je preda!
Gingavi betežnik, reč naša tožno blodi,
zlahkotenje iščuč, prekletom kmicom hodi,
cendrava bogčija i ničemurna laž,
bahorije žuhke, lamentacije trule,
v trijumfu noseč rodoljubne nule,
neraspletne vuzle i bedastočah špule,
vigilijah nočneh i nadgrobneh straž.
Reč kajkavska pred nami je pokran, prezen grob,
znuternja kervava, razvudenje, drob.
"Ak pjevat vam se hoće, a sami ne znate kako",
pjevajte kajkavske Riječi staru kajkavsku kob!
Reč Ignis Festivus luctvu biti ima:
jogenj kaj plameno na veselje plamni.
A nasa Reč v megli kervavoga dima
kak opoganjen ogorek gesne i tamni.
Se otenčenje tu je mračno, a ne regètlin goroč,
kertovine, blato i kermežljiva noč.
Na skolkam čkomi smartnosprepluvana Reč,
a pismoznancov ni, ni harfe ni več.
Purgarija naša ne jenoga je Vramca
zdruzgala kak steklog pesa samca,
regečuč nad ftoplenikom z čamca.
Ne jeden Škrinjarič judicijum koruptni
je znal da grize kak čemerni kal mutni.
Orsaški zvertavci, knjigari, kruhoborci,
al su klopotali kak grofovski norci,
alpak kak megle rataji su stali
na pranger, da ih osel popluje i spali.
Popluvan gdo ni bil, taj dunsta imat nemre,
kaj su pravzaprav domači naši, oselski ideali!
O, ti betežni, davni, zimljičavi dani,
gda knjigari gladni, tožni Lutorani,
kak amrelari se po blatu vlekli jesu.
Po Lutoranu saki kak po steklom pesu
lupal je i pluval po zgnjitoj pesjoj rani,
o, ti betežni, hmajni, strašni, davni dani!
V tem žuhkim, polglasnim, cmizdravem korotam,
lutoranjskim harfam, puntarom, sirotam,
pluvačka i pranger su bili honorar.
I denes još navek poet je pioner,
zritan i sprepluvan kak stekli pes i zver.
I denes je poetu navek još hraček dar,
navek bu tak, drugač nebu nigdar.
Gdo penezolovec ni ni jagar karijer,
kušencije ne teržeč, kameleon, licemer,
gdo Ars Scribendi et Bene Vivendi
v vomitorijumu na masnej Prebendi
ne bljuje zvust kak Veniam Legendi,
gdo pomeknjenec ni na grofovskoj arendi,
za tega ni neg naška Ars pesja Moriendi.
Talentum menjše vredi neg pišiva skolopendra,
pri nas ni vrag za martvim talentom ne cendra.
Dežđevna megla, megla, meglena selendra.
Červojedine vutle i sperhnuta krama,
gingava hiža i najža brez trama.
Špigl brez stekla, kipec brez rama,
bogčija, žalost, šoštarkalendarska tama.
Špange i lesice, zaškrabano lice,
fratri, cirkve, posti, meglene zornice,
biškupi i norme, zvona, opatice,
pernati skunkači, ketači bez žbice,
kak tri kervave tice su tri copernice
preletele prek blatne Harmice.
Negdo se vleče s kervavom glavom v roki,
kervavi mosti, kervavi potoki,
bogec pod štengami v smartnonosnoj moki
i latinski verzi nerazumnogliboki,
hahari, hudičevi snuboki,
se to teče v tenji kajkavske vmiruče reči,
se blešči kak karpit skerlatni, rdeči,
kak regètlin gasne, zvezdani, goreči,
v neistolnačno mračnom nečutenju reči.
Pogrebni marš, ilerski marš brenčeči.
V megli sem videl, videl sem v megli:
seh križneh putov konec i kraj.
V meglenom blatu, v pogrebnom maršu,
otkod nas nigda več nebu nazaj,
Ileri kak pilki, faklonosi,
zaškrabani dijaki, larfonosi,
pokapali su paradno starinsku reč Kaj.
Kak zvon je Kaj grmelo,
kak kres je Kaj plamtelo,
kak jogenj, kak harfa vekomaj,
a oberpilko v gali,
s pogrebnom faklom v roki,
med ilerskimi fanti,
mertvečkemi snuboki,
španceral se
doktor Ludwig von Gay.
V hintovu srebrenom, z šesnaestemi vranci,
Khuena sem videl z gardom i s hajduki.
Chavrak i Bresztyenszky i drugi mameluki
za hintovom srebrenim z šesnaestemi vranci
su lajali vivat kak kurve i posranci,
a narod je kak marha drezgetal v štali z lanci.
Zobun z krentuha i skarletine,
ruke kak fajtne hladnetine,
baret od velura mohojarskog,
kerzno od dabra jastrebarskog,
tak je bil te ban, kak nadorišpan,
palatina vugerskog nadrišpan.
Fačuk, bastard i kopilan,
mandril i hahar, madžaronski kan,
na Markovemu Placu kaj je imel stan
dvajzdva leta stoijeden dan.
Za hintovom srebrenim, z šesnaestemi vranci
regetali su "eljen" z gulašom i z žganci,
dijetenklasni bogci, potplačeni pijanci,
Lengyeli i Toti, kuferaši, stranci,
najglasnejši bobni v madžaronskoj "stranci",
kervave kadrile najčalarnejši tanci.
Regnikolarni klatež pokojneh domorocov,
perkelta, filekov, izborneh gombocov:
feldcajgmajstri graničari, janjičari kancelisti,
liberali Međimorci i Primorci unionisti,
službeniki, činovniki, štreberi i centralisti,
biškupi i stožerniki, Turopolci navek isti.
Na se laži spremni, takdabi s peruti
naoljit mogli čreva sakej cafuti,
če bisagi su puni, konji zapregnuti,
za francjozeforden - mandril taj saki kruti
triput prisegne krivo v jenoj jedinoj minuti,
čerlenobelozeleni, fakini čarnožuti!
V đoput sinekure zamotani zvertavci,
habenci, pomeknjenci, srakari, hrustavci,
nasrečuhitavci i himbolajavci,
sakem banskem migu kusati lajavci,
lepa naša doloroza,
puna flaša, puna doza,
capfenštrajh, šljivarska loza
praktičnika, bangaloza.
A cilindri, rukavice,
činovniki: rit kak lice,
si presvetli z naftalina,
se presvetle hausherice,
kuharice, kelnerice,
galženjaki, coparnice,
kišobrani, gumbašnice,
od Ilice do Harmice,
si blejiju v bansko lice,
kak da buju klobasice,
devenice, pečenice,
pajceki i mandalice
curele se prek Harmice.
Kak v kvarglin červi za banskim pleziju črevom
privatni docenti, "poglaviti" bogci,
sakem loncu rigla, samostalci, šokci,
sakem blatnem triku pravnički umokci,
Bunjevci i Raci, Vandali, Ileri, Goti,
v otajnem špotu, v tuđinskoj sramoti,
dunajski grofi, prejasni idijoti,
hausherovski cucki, kervavi faloti,
Ungarezi knezi z baronskemi penezi
zeksleksiravleju lekse kak tatarski despoti,
a horvacki muži kak Cernci i Heloti
mužikaju kervavo v urbarijalnoj koroti.
V tem našem peklu z božjum milostjum,
gde madžarskem galgam blagoslov je kum,
a saki drugi Um je "naš Veleum",
kaj ostalo je kmetu? Cunard Line i Rum.
V megli sem videl banski cimtorijum.
Oko bana svinjsko, slugansko stanje,
trafikantsko, blesavo kokodakanje:
praznoglavci norci klopočeju kak škvorci,
strašljivci su naši "iz uvjerenja" borci,
presvetli de Francisci i drugi Sanoborci,
herđavi Keršnjavi i drugi slični mravi
ferflaju kak koruš: Sent-Ištvan-kruhoborci.
Natikači, pletigači
z madžaronskemi mustači,
niščevniki, niščekoji,
saki Mužu kožu kroji.
Oružniki, maškaraši,
nagodbenjački mužikaši,
nadribani, kuferaši,
saki Mužu starku praši.
Kurenti, šenti, hmani žbiri,
ti blatni, kervavi barbiri,
ti kraljevski zemaljski trojedni činovniki,
beskušencije naše vekivečni liki.
Bože, čuvaj, bože, štiti
bana našeg s tem banditi.
I biškupa Štrocu sem videl v megli,
kak babu na loncu, gde sedi na cegli.
I Bana Mažurana z bakenbarti sivi,
nigdar ne zgine kak ban gdo jemput živi.
I Starog sem videl v tej kervavoj megli,
kak Stari z virđinkom pod krovom sedi.
V đakovečku meglu,
v gornjogradsku meglu
za dimom dim kadi.
Dok Biškup Štroco v tenji đakovečke geste,
pod toplem krovom biškupske sijeste,
gladnog Muža hrani z "nafarbanom Toskanom",
pod črlenom lampom, pod Khuenom banom,
v gunguli, s cigarom i z madžarskem duhanom,
pod črlenom lampom Rada, Zakona i Reda,
Stari se punta i Stari pluje
na biškupsku "žlicu duševnog sladoleda",
s kojom biškup Muža nahraniti gleda.
Stara, posteklela korenika se ne da!
Nigdar nebu v megli Spomenika imal
kaj nigdar je ne s klimavcima klimal.
Okolo Starog, vidim, perhučeju zagrepci,
kak okolo Tornja preplašeni vrepci.
Poglaviti i presvetli, na gnojnišču blatni petli,
kaj jašeju paragraflin kakti z lojem vrag na metli,
plavokervni bogci, žakli nacifrani,
herkali su v luknjah, faloti prefrigani,
presite pijavke v gnojnoj, blatnoj rani,
kancelari, bani, doktorski nadrišpani,
kaj zijaju v klobase na madžarskoj grani,
eršeki dvorski, jopci engeduvani,
kaj jeden drugog fkani i fkaniti kani,
sove i šišmiši v beamterskeh škuljah,
gungula lotrov, lajharov i huljah,
klimavci prodani, čalarni saboraši,
kaj berstiju ternje homagijalneh laži,
gerdobe i blezge na krepanoj straži,
saldakonto pravde v činovničkoj gaži.
Habsburg kuha naše meso v svom tirolskem loncu,
šnapslin na Kaptolu i špricer na Dolcu,
a glava horvacka na madžaronskem kolcu.
V bezakonju, v samosilju,
v samovolji, v soldačiji,
v fehtačini, v kerplačini,
v zakerpami i v bogčiji,
Stari je jedini madžarskemi grandi
plunul v oko kak se šika bandi,
gda teržilo se pri nas na saborskemi štandi
z magnatskemi lanci i z Bezirksvorstandi,
jedini je Stari klel po tej kontrabandi.
Stari ni bil malar za teleče oči,
niti pero za škilavce čtavce.
Jedini lampaš v kermežljivoj noči,
kak germlavine bas za naše tupoglavce.
Se bilo je testeno kak z ilovače štrudlin,
se prepokorno kak na pijaninu pudlin,
sprekuhano se kak štajerski nudlin,
dika nečemurna za dunajski guldin.
Jedini cagar na tem ciferblatu,
jedini potez na našem šahmatu,
jedina skala v megli, v ilovači, v blatu,
kaj Dantea citira kakti glas trumbente:
"Per me si va tra la perduta gente..."
A kaj je briga te vušlive levente,
tronuša dunajskeg gingave kurente,
kaj teržiju savjest na percente,
v tenji kanona, kavaleriregemente
(za baronat i plemstvo, za doktorat i lente,
kaj prodali bi boga i se nebeške sente,
za srebrene, brenčeče argumente),
kaj gilta Dante za te pišive, vutle šente
i šintare koji z vagom punog žepa
glediju mirno če pravica krepa.
Tih štreberov bogečkih mizerna, gladna čreda
derži se slepo khuenovskog Kreda:
pred Banom plaziti i kmeta gaziti,
kak cucek na saki banski mig paziti,
v otajnosti petljati, lagati, krasti,
v saborišču lajat "o narodnoj časti",
čerčkati, lagati, brez glave, brez repa,
da naša je domovina naša i lepa,
kaj ak ju Khuen šiša, davi, gnjavi, cepa,
žitek je prelep iz prepunog žepa.
Pekleni, banski, khuenovski trik:
na galge marš, al marš na spomenik!
Saki spomenik iscecan je čik,
a poštenjaku za vrat treba deti štrik.
Kak vu centrum sveta bleječ v svoj terbuh,
tak filozofjera madžaronski puh.
Kaj njemu more Dante al' danteovski duh,
gda je za to gluh presvetli klapavuh.
A Hapšpurg nas bogce kak strašilo plaši
z Reskriptom Previšnjim: Verni i Mili Naši.
Verni i mili naši, žvalavi mozulaši,
klimavci prodani, čalarni saboraši,
s poganicom mrenom na oku, pajdaši,
plemenitaši, virilci, senilci, kuferaši,
klečiju pred Hapšpurgom kak pri božjoj maši.
Nevini Jaganjčec v lavoričnej rami,
nakinčen kak Fašnik samitnem pantljikami.
Gespen Hapšpurg zgledi kak krepani kozel,
kravatlin maršalski ma zvezan na vozel.
Zlatoruni lanec, ogerlič đunđeni,
anglikanjski čipkeš i lonec sukneni.
Kak ultimatula gliboki žep,
gobec kak jopec gda vonjha si pod rep.
S trumbentami, s helebardami,
s fanfarami, s horugvami,
Hahar, tolvaj, v lakjeranem glancu,
tak zgledi medalja na grofovskem lancu
kaj cmače ju naš Sabor, gda hapšpurški kaljun
patancjera Orsag, spreluknani čun.
Tuljanski šnicar strugal taj carski je pancer,
bleščeči kakti z tumbaka tanjer.
V kipčecu filovem zestrugana Madona,
kaj detešce zible v zipčici od kanona,
na napersnjaku s pleha: princa i dragona.
Po oklopu zešnican cvatoč je lilijom,
mustače nosi taj belvederski som,
mustače masne od fajtnega viksa.
Pod tronušom čepiju tri kuferna Feniksa,
kak nosiju Mu tronuš: carski spomenik,
na kemu dremle Gespen Hapšpurg,
naš Obertabornjik.
Ban Khuen, Grof, Velmož i carski Komornjik,
kak hoštiju zdigavle taj nadzemaljski Lik.
Stari se dere, kune, kak čifut v Sinagoge,
Spravišče naše nema ni glave ni noge.
Kaj gilta za te osle, te šintarske doge,
argumentum Reči, Ris retorske toge,
za te žakle lene i prirepke boge?
Reč Staroga teče kak gorski zviranjek,
v kem Sabor se namače kak smardljivi canjek.
Tenehna i plava,
akvamarinska tenja Lune,
Gondola z leutom
i s pesmom o Fortune,
na karpitu skerlatnom v dubrovačkem plašču,
z mesečinom, z arabijanskom mašču,
vabil je nas v dubrovačku bašču.
Srebrene pene puna,
z grofovskeg straduna,
zelena kak luna
(balon od sapuna),
zvonela kak zvono
blondina je Fortuna:
"Kolo od Sreće uokoli
Vrteći se ne pristaje:
Tko bi gori, eto je doli,
A tko doli, gori ustaje:"
Na tem su ketaču navek oni gori,
kaj su bili gori gda bili jesu gori.
Za bogca i v peklu pod tabanum gori,
majori su v nebu i v peklu majori!
Za kanturu jen jašprišt tri keliha je fkral,
a slepoj bogici je krajcer dal.
V nebo je jašprišt kak dobrodejal
ob desnu gospona boga stal,
(tri keliha fkral, jen krajcer je dal),
a babu je spekel Sardanapal,
kaj fkrala je sveču za copernjački bal.
"Tko bi gori, eto je doli,
A tko doli, gori ustaje."
Tak se rog za sveču daje,
zlo navek pod nebom traje,
osel se za grehe kaje.
Jeden je rojen vu paradne vure,
kak škarlatni erbič dične sinekure:
na gizdost, na lorber, na trompete,
a drugi kak fačuk, sluganovo dete.
Za pervoga su pune se zdele Fortune,
a bogca i v peklu Markaj friga, tenfa, kune.
Jeden kak kelih trojačkog cveta cvete,
a drugom veter pod zipčicom mete.
Cigan je jeden, a drugi pokolenja
vleče od pervog dana stvorenja.
Jeden nosi pamet spreluknanu, tupu,
pak bu ipak zupal najmasnejšu zupu,
a drugi bu zveršil na infamnem stupu.
Jeden zgledi kak kuruzno strašilo,
pasjeral bu žitek na zlatno nosilo.
Drugi je opal v Majke Božje krilo,
hahar bu mu otparl pod tretjim rebrom žilo,
tak je navek v tom našem peklu bilo,
tak je bilo i tak bude bilo.
Kaj su gore doli, ti su dole doli,
zakaj su gore bili gladni, bosi, goli?
Oni kaj su gore bili bormeš siti,
ti su v peklu doli slavni, uzoriti!
V stubičkoj kripte kervavi Tahi spi,
pod oklopom vitez, taj peklenski pes,
a ima spomenika, kaj imel je penez!
Za Pasanca, za Gobca spomenika ni,
za petsto tikvi muški, na stubičke hruški
kaj zibleju se si.
Martinoviču, pismoznancu, vučenjaku, Jakobencu,
brez glave je pojti v pekel,
v Plutonovu mračnu sencu.
Kaj pisal je knjige o Harmoniji Naturali,
zato su mu baltu pod gerklan dali.
Zakaj je pisal o čistoj Mathesis,
a je ne zvonil s cekini, s penezi.
A Grabovec pater je opet v Mletke
opal da krepa iza rešetke,
zakaj je v Benetke nosil ne imetke,
neg jalove horvacke kvaterne petke,
kaj peklene imaju, kervave svršetke.
Oj, Gondola, Gondola, zaplavala ti gondola,
dalko od našeg kalnog kanala!
Kaj na tvem ketaču tega bakanala
spoznal si se tajne horvackega bala:
domorodec, koji je zbog penez hodil v Peštu,
bil je domorodec kom se v peklu šika
postavit spomenika.
Nevernik zbantuvani če sedel je v reštu,
zakaj je bil bedast i ne hodil v Peštu?
Naj nam kvarit našu integralnu
sentištvansku Feštu!
Prisegnul zakaj si ne na Pacta Conventa,
kinčila bi te denes integralna lenta!
Zakaj si se stenjil za Narod do sence,
hahari v peklu nosiju žulence!
Ak nisi hotel v Peštu, mogel si iti v Beč,
z kupleraja nazaj te nigdar nebu več!
Merkavec pravi v Inferno je posejal svoje senje,
gdo dobro merka taj dobro i ženje.
Čarnopreslečeni pogrebni boben,
glasu čreva luciferskog spodoben,
i cinkuša zvon kak gumbašnica droben.
Petrice plač kajkavskog bedaka,
ognjene solze gričkog loterščaka,
se to me je zmlelo: norega copernjaka.
Dišalo je se kak čarna čaša maka,
opelo, sprevod i truga od laka.
Trombente vražnje vražnjeg marcia funebre,
karvi brez hasni, a solzah na čebre,
ris žvepleni smertnopogibelne febre,
kak kača me je splelo, zgusnul mi se dah,
na jabuke gerlenoj sedel mi je strah,
da solze nisem mogel proslinit, ni sline.
Zgubil sem se v megli, v blatu, v pomerčine.
Glas je zazvonel iz temne glibline.
Kak da se je otparla
moja jama sama,
javila se Zemlja, kak Kip,
kak Dojka, Mama,
ku cecali smo od straha kakti deca,
gda mrak je dohodil i perhala tmeca.
I rekla mi je Zemlja, kakti dobra teca:
On zgoreti kotec na tri palanjka,
i prekleti melin s tridesettri ganjka,
i peklena zganjka rascufanega canjka,
i stražnjica kaj se sama v svojem blatu sanjka,
se je to čemer peklenog oblizanjka.
Čislo smisla v čislu besmisla,
golubica s perutmi pokisla,
kaj ju je hijena v svoje parkle stisla!
Žitek je zganjka Ribe Kobile,
naprejspreštimana Planeta Sibile.
Žitek tanec je kanikule pesje,
korizmeni štakor i Ivanjski Kres je.
Človek biti ima mertuhlivi stvor,
po lojtram se pentra v Nebe gor.
Na vanjkušu nebeskom bu cele dane spal,
če ga nebu spekel Sardanapal.
Kak šoštar dretvu, tak človek veru liže,
saki dan je koncu za jenu špulu bliže.
Kemu Plajbajz jedina je lanča,
taj se z vetrom panča kak Osel od La Manča.
V zacopranih gliblinah gdo zlamenje išče,
taj nigdar nigde nebu našel nišče.
Arpadovci, Jagelonci, Zapoljanci, Babilonci
lupaju po tikvam našim,
kak hahari po truli lonci.
Turčin, Kurdi, Venecijanci,
kuge, kugle, jogenj, žganci,
se levente, se trumbente,
herpaukari, poderanci,
se nas škopi z sablom, z lanci,
Lutorani, Austrijanci,
Hapšpurgi i Anžuvini,
Serenissima, fakini,
Pšemislovci i Korvini,
turski kolci i Tirolci,
se po nami bluje, slini,
z štrikom, z baltom i s tobolci.
Ježuviti, dretvosmolci
i biškupi čarnoškolci.
Precoprat se to hotel naš Križanič je Jurko,
zvlekel reverendu i horvacko surko.
V Siberiji zavijal je taj vok za Uralom,
zmlela ga je megla kak pekleni malom.
Gondolu si videl! Kak frajlu s parikom,
vu fertuhu čerlenom i z benečkom kikom.
Čul si kaj popevle pod svojim spomenikom,
v škarlatnem talaru, poet tuljanskeh jopcov,
v štrumfama, z gitarom, idol stradunskeh škopcov,
kramarov, svečarov, lajharov i grofov,
ki si skup nesu meli - ni za lek - pet knofov.
Panoptikum taj bogi od cunjah z naftalina,
o, ta plavokervna gospoščija fina,
prepoznat kaj ne htela zidarskega sina,
v "Salon" ga ni sprejela "kak stradunskeg fakina":
Sopilovog Frana, slavneg gospodina!
Sopilovog Frana,
ki tolvaja imel je za bana.
Sopilovog Frana,
kem serce pregrizla horvacka je rana.
Krepal je v blatu, kak roža bez tegla,
požrla ga je megla, kervava, čarna megla.
Brez spomenika spi v preslavnoj Raguze,
bogečke kaj nigdar ju pekle nisu suze.
Sors bona Krobota: emigrare domo,
če pravi človek je, kmet, bogec i homo.
Ne jeden naš bogec je emigréral domo,
kaj bil je človek, a je ne bil gnomo.
A če se je gdapak još domòv povernul,
pilko ga je na lopate obernul.
Videl si megle, megle si videl,
ilerski čul si paradni čarni boben,
glas šorša, glas črevu hudiča spodoben.
V Stenjevcu si gledel poete, fiškale,
kaj bili su fortenceri za poetske bale:
se naši talenti, norci, školniki,
gengavci, romari i hmajni bolniki,
krepavleju ti bogci okolo naše knjige,
kak metuli nočni v blatu blatne brige.
Litanije kervave, bogčija bangalozna,
i pesme pogrebne, agonija porozna,
pranger i galge, jeremijada grozna,
karmine, strašila, vojščine banjske, stranjske,
kaj tečeju kak megle al snežnice lanjske.
V norchauzu, na galgam, v sudnici i v grobu,
z štrikom o vratu, s kuglama v drobu,
se to su bobotki za scopranu gobu,
za peklene muke, peklenu gerdobu.
Videl sem v megli Reč
kak se preobrača v grobu.
I videl sem daljine, meglene i kalne,
i videl sem glibline, se dalne i dalne.
I videl sem strele, žveplene, blisiču,
občutel sem merliča perst na ogerliču.
Čuli su se glasi kak germlavine basi:
Bežete, bežete, vi pogane žuči,
tuče se čarne spremaju potuči
se vas v domovine, v polju i po kuči,
kaj blodite bez doma po vetru i po tuči.
V kmici, v pivnici,
brez ikakšne luči,
čul se je veter
kak v praznini huči,
s kervavemi nokti v drobu, v mozgu, v žuči,
zalajal sam kak samec, kervavi pes vmiruči.
