Ja tebe dajem ove pesme moje,
To najlepši je i jedini dar,
Kaj znam i morem dati; primli bar
To zadnje cvetje domovine svoje.
Govoril jesi navek, da je samo
Vu goricaj živlenja pravi raj,
Koji nigdar več ne dojde nam nazaj;
Mi iščemo ga, - ali - kaj mi znamo?!
Spred naše kleti ovo cvetje za te
Ja nabral jesem i vu pesme zvil,
Tam gore dok sam s tebom samem bil
I gledel, kak so dal'ko zvezde zlate.
Ti razmel bodeš ove drage glase
I v srcu ti bo težko, ja to znam,
I ti si, kak i ja, tak stašno sam,
Ti z menom skupa čakaš stare čase.
