Da liti nima bave po meštralu,
brzo bi vrag odni šalu,
kad ožeže zvizdan po feralu.
Brzo bidu i Francuzice
pokrile svoj dil guzice,
pa bidu i naši «dečki»
govorili manje tudeški;
a drugčije bi se i u Francuza
oni gospodin trguza
i drugčije bi mu stalo ono gada
da ne kargaje vitar sa zapada,
da meštral svu sezonu
ne hladi ugroženu zonu.
Ali kad se naprčidu adam i eva
on radi leva-leva
i ne uzimje svoj godišnji odmor
dokle god se judi uklanjadu pod bor
i stranci išćedu Turistički odbor.
Pa isto u razne prošpekte
di su nacrtani hoteli i žala
njega niko nianki ne spominje
- i to mu je fala.
