Lan
autor: Dragutin Domjanić




Dalko polje, beli dan,
V polju se zaplavil lan.
Rosa drobna se sveti,
Duša draga, gde si ti?
Rosu bude sunce vzelo,
Bu li moje suze štelo?
Rekel si: "Kad cvel bu lan,
Buš vre moja v onaj dan!"
Vidiš, sad se vse plavi,
Zakaj jošće kesniš ti?
Z žalosti bledi mi lice,
Naj pozabit, naj bogice!
Kaj po boju gde ležiš,
Za navek pod poljem spiš?
Poveč mi: kad lan bu cvel,
Buš od mene senjat štel?
- Tak ja dragam cvetje lana,
Tak boli me v srcu rana.