Veter z Medvednice
košutah pajdaš,
v hegede i v gajde
zasviral je gajdaš.
Protuletni veter zagorski harfaš,
sverži zibluč, želud, šiške, grozje, šaš.
Prek goric i kleti, brejih, fajtnih paš,
ze semi klopoci, vinski otec naš,
zapeval je veter vekvečni orgulaš.
Karvan vu herži hmajni pučpurič,
s krelutmi goruči sunčeni fenič,
kak regetlin žvepleni zapalil mu se krič,
zapahal se nad oblak protuletni ftič!
Kak žoltar zvoneči tanec cvetuč,
kolobar poldešnji je jogenj goruč.
Oblak breji dežda, germlavine, tuč,
pređurjevski žabci glasno regečuč.
Veter v harfe svira kak harfa pojuč.
Veselete se daljine,
veselete se ravnine,
ribe, vode i vedrine,
pavučine i glibline,
ftiči, kače, se živine,
protuletne germlavine
i vuzmene dežđevine,
našlo se bu vre pitvine
v tenji ledvene lagvine.
Veselete se sprekleti,
bogci, čuklavci i kmeti:
još nam mošta ima v kleti,
sunce v poldan simi sveti,
dol ga nigdo nemre zeti,
ni bogatuš v svoj žep deti.
Veselete se vedrine,
zapalete se žarine,
se tenčine, se sparine,
se nizine, se visine,
kervarine, pomerčine,
z mesečine na višnjine,
z babjeg leta vu sparine
dozrelo bu slatke vine!
Nebo je čerlene,
si se bogci žene.
Mačka se hmiva,
bu lepo vreme,
zutra oblake orati greme.
Mesec se skriva,
bu kišno vreme,
nočas ščuke loviti greme.
Gda gatalinec štrok,
kak žerjavov snubok,
žabe spravla v smok,
protuletje ide
skok na skok.
Kukuvača kuka,
a mečovoj Đuka
kači zube puka.
Sveti Luka
orehe fruštuka.
Od Lovrenča
četernja je zdenča.
Vshodni veter je vedriš,
a poldešnji pun je kiš.
Zahodni pak sanoborec
berbonosni nam je zgorec.
Poldešnji je pašovabec,
pun glist, dežđa, rib i žabec.
Rana germlavina
jesenja sparina,
večernja žarina
juternja vedrina.
Prezimec z vodami,
a travanj s pašami.
Germlavina zimska
slaba berba vinska.
Dan svetog Vincenca
luka tristri venca
alduje čerlenca.
Sunčano leto sadonosno leto,
blatno leto, kruha gladno leto.
Sunčani vedri kolobar
nosi ploden kolendar.
Herž, šenice, tersje,
vručine zore pesje.
Vojuvanje vetrov malo hasne nosi,
polnočni veter herž v orsag donosi.
Kolovožnjak tanca po tratinah bosi,
po hasnovite, mlačne, blagoslovne rosi.
Velkomešnjak grozje na tanjeru nosi,
malomešnjak pervo žuto lisje kosi.
Jesen na pragu, sisvetske megle,
katarinčic pune su tegle.
Severec Silvestrov z snežne Medvednice,
jaglin v čurki, đumber v devenice.
