Zreli nam jačmen naš, zreli
Sunčece grej i za nas,
Da bi ga zlatnoga želi,
Da bi mu spunil se klas.
On, koj je sejal te širom,
V stranjski odišel je kraj,
Čekam i čekam ga zmirom,
Nî ga tak dugo nazaj.
Išel je v strni krvave,
Tam, gde je vsakoga zla,
Tam, gde su grobja spod trave,
Bog zna, je l' dojde mi gda?
On nas je hranil i branil,
Sada nam nikoga ni,
Buš li nam dečicu hranil
Sada naš jačmen bar ti?!
Zreli nam jačmen naš, zreli,
Sunčece grej i za nas,
Da bi ga zlatnoga želi,
Da bi mu spunil se klas.
