Belo akacija cvate,
Sunca prepleće se trak,
Lasi ti imaš tak zlate,
Obraz ti beli je tak.
Pune aleje su cveta,
Pun im je šeptanja hlad,
Duga su, duga ta leta,
Kaj te ja imam vre rad.
Štel bi, da mene aleje
Pelaju tam, gde si ti,
Da mi se srce nasmeje
Jenput, tak dugo vre nî.
I da te nekaj popita,
Če te još pitati sme:
Si li navek još srdita,
Il si me zabila vre?
- Veter je glas moj odnesel
Vsikud je kmica i hlad,
Smeh je razlejal se vesel,
Z drugim se smeješ ti sad...
