Živad na straži

Živad na straži autor: nepoznat

Jenput su tati strašno navalili na živad. Hoteli su se pokrast. Onda živad zberedu sednicu: tu se složi kokot, racman, puran i gusak. Oni skončaju, kaj budu napravili. I onda dokončaju, da budu stražu držali, i to: kokot, racman, puran i gusak. I oni primljeju na večer stražu: kokot prvi, racman drugi, puran treći, a gusak četrti. Držidu oni tu stražu, i evo dojdu tati. Onda kokot naglo zakriči:

- A kado je to?

Racman na to veli:

- Tat, tat, tat.

Puran krikne:

- Vudri ga!

A gusak:

- Na galge ž nem.

Kad s to tati čuli, oni bejž, a puran zakriči:

- Vohoho!

A gusak:

- Vagaj ga!

I tati su od velikoga straha komaj pobegli. Drugi dan su dobili ovi stražari strašnu pofalu, da je živad ostala.