Na Braču umendule
u misicu jenaru procvale.
(E, nisu znale).
Cvatu umendule
i mladi janci skaču
po Braču.
A na Biokovu do kolina snig
i Vlasi ne maru
nijanki živit u jenaru.
Jidaju Bračani
i jidaju Vlasi.
Pa Vlasi mislidu:
kako je lipo od umendule cviće,
i kako su Bračani judi od sriće
i kako ćedu bez muke napunit vriće.
A Bračani štroligadu
kako bi moglo bit plača,
kad poludi vejača
i bura uništi cvit
(i kako naopako gre svit).
A Vlasi bidu rada
da umendule zdriju sada,
a snig da liti pada.
